煮療

無論幾忙，最緊要有時間做自己、做自己鍾意嘅嘢。已經frustrated 好耐，一直都鬼打牆，好掙扎。最近終於突破咗少少，講咗就嚟半年終於做。

半年冇入廚，一諗起可以煮自己鐘意嘅嘢食就好興奮。係廚櫃摷出幾年前親戚係新加坡帶返嚟嘅肉骨茶，買一條豬骨，丟3大舊蒜頭。一個鐘後成個廚房飄香。雖然味道同之前唔同，太重胡椒味太鹹，但好滿足。

細個果陣，屋企人話收工去街市買餸平。諗住收工之後去街市買餸，搭車果陣諗定買花甲整花甲粉。點知去到街市已經收晒檔，乜都買唔到。以前7點都有人買餸，宜家晏晝同夜晚一樣拍烏蠅。而且餸貴咗好多，生菜竟然$12/斤，蔬菜$9/份。見到「新界佬」標榜本地豬，幫趁後生仔，點知一條豬骨煲湯$70。

最後唯有買個便當返屋企，再炒碟菜，食完洗埋嘢已經好晏。乜都做唔到。如果同父母住，返屋企就有飯食，食完就可以做自己嘢。（主動提出過洗碗但被人鬧，唔好問點解。）

過左個幾禮拜自己生活，覺得可以繼續向前行，於是一直行到依家。發現同父母同住也不錯，起碼有湯飲。果個禮拜每餐飲3、4碗湯。滿足。